|
~’, سلسلة القصص ’’ الاعضاء الذهبيهَ .’,~
السلام عليكم ورحمه الله وبركاته ..
http://zffat.com/up/upfiles/bku27563.jpg سلسلة قصص الاعضاء الذهبيه .. ’,’,’,’,’,’,’, فكرتي .. ان حنا نجمع القصص الاعضاء في هذه الصفحه .. كل واحد يدخل يلقي لنا قصه حدثت له .. او حدثت لأحد من اصدقائك .. وكذا نكون موسوعه من سلسلة قصص الاعضاء .. منها حنا نقرأ ونستفيد او تفيدنا من قصتك .. او لغيرك .. ’,’,’,’,’,’, اتمنى ان يكون محط الاعجابكم .. ’,’, ’,’, ’,’, ’,’, دمتم بحفظ الرحمن .. .. .. .. .. المجروح 78 ]/.. |
رد: ~’, سلسلة القصص ’’ الاعضاء الذهبيهَ .’,~
فكرة رائعة جدا ً ..
اتمنى من الجميع التفاعل ، وبحسب التفاعل سيتم تثبيت هذا الموضوع في بالي قصة قد حصلت لي .. لكن لاأتمنى أنا من يبدأ بطرح وقائع قصصه الله يعطيك العافيه أخي المجروح 78 تمنى أن نرى لك قصة قد وقعة لك تميزت في هذا الطرح .. ونترقب جديدك النير والله ولي التوفيق |
رد: ~’, سلسلة القصص ’’ الاعضاء الذهبيهَ .’,~
قصتي ..
كان من زمان لي صاحب .. دخلت قلبه ودخل قلبي .. كنا في بدايت الصداقه نجلس في زاويه .. ونسولف قرابت ساعه .. الى ما ان تطور الامر .. وكنا نتواعد عند بيتنا او بيتهم .. كنا لا نفارق بعض .. لكن مشكله كان له صديق حميم لكن ذهب عليه .. ودور غيره .. انتهز الفرصه .. فكنا الصديقيين حميميين .. نتفق على اشياء ونفعلها .. كنا نصاحب كل شئ .. ونتعرف على اي شئ امامنا ..وجاءت فرص .. لكي نكلم اهله لذهاب معنا الى البحر .. فعلا كلمناهم .. ووافق ابيه . كان من اسعد يوم لي حينما وافق ابيه وذهب معنا .. اعددنا العده للمشي .. ووصلنا الى البحر .. ركبنا الموج .. ودخلنا البحر .. وسبحنا معا .. جاء وقت الشوي .. كان هناك بعض يتابع الفلم .. ولبعض يشتغل في عدت الشوي .. وجاءت الفرصه لكي اخبره مابي داخل قلبي .. فعلا كلمت صديقي الحميم .. لكي يكون الواسطه بيني وبينه .. ورضى .. واخذ الشخص لحاله يجول به في البحر .. ما اذا الا وصل .. وطلب مني النهوض لكي يخبرني ايضا بما يريد .. ذهبا الى البحر وجلسنا .. واعتنقنا البعض .. كالعلاقه جديده بدءت .. :p وكانت من اروع لحظات عند معانقته .. ويستمر العطاء بيني وبينه .. الى ان جاء اناس وخربت نظرته علي .. وكان لا يطيق التحدث معي .. فانا كنت : لما لا اذهب .. الى منزلهم لاعرف السبب عدم تحدثه معي .. طرقت باب بيتهم .. وصدفه يظهر لي هو بنفسه .. وامسكه .. قلت له .. انا اريد ان اتحدث معك ولو كانت اخر لحظه .. فعلا استجاب لي .. وطال الحديث بيني وبينه .. واخر شئ كان حديثه .. على انه قال لي انك كذاب ..و لم تكن صادق .. هنا بدء الجرح .. قلت لا اصدق الكلام هذا .. انت جرحتيني .. ~~ هذا سبب تسميت نفسي بهذا الاسم .. المجروح 78 .. ~~ نكمل .. قلت .. هذا نظرتك لي .. قال نعم .. فعلا .. مشيت منه .. وبحثت عن السبب قوله .. كان من الشخص لا يخاف ربه يريد مباعدتي عنه لكي يكون خوييه .. لكن لم يحصل مايريده .. وبفعل استمرت الحياه على ما هي .. لكن بلحظه التقيت به صدفت ً في السوق .. وكلمته وقال ليي لقاء معك .. وانا انتظر هذا اللقاء .. عرفتم السبب في تسميت نفسي بهذا الاسم .. نهايه .. اتمنى انكم قراتموها .. اتمنى منكم التفاعل .. بالتوفيق .. |
رد: ~’, سلسلة القصص ’’ الاعضاء الذهبيهَ .’,~
فكرررررره راائعه
واليكم قصتي:: قبل 4 سنين تقريبا كنا بسوريا داخل الحضره كل يوم نجلس عند قبور الشهداء اذا كنتو تعرفونها المهم دايم نشوف وحده تجلس جنبنا ليما تعرفت علينا وتعرفنا عليها طيبه ومحترمه ماعليها كلام و4 يوم قالت تعالو بيتي بقرا لكم الكف عاد احنا فرحنا هههه خبركم نحب اللقافه ومن باب التسليه رضينا ورحنا كان بالفجر بس خلصنا الصلاه رحنا معاها بس حنا البنات مامعنا احد الزبده رحنا مكااان بعيد عن الحضره المهم وصلنا بيتهم وفسخت عباتها وسوت الشاي وجات بس باقي عليها حجاب وجلسنا وجلت قدامي حسيت برجفه مو طبيعيه شفتها شكل ثاني المهم نبي نطلع بأي وسيله نشف دمي نظراتها حسيت انها بتسوي شي لنا وقمت على طول فتحت باب الشارع وأطير انا وخواتي .. يوم ثاني علمنا الخدام اللي بالحضره وأمسكوها وأثر الحرمه وراها بلااوي .. بس الله نجانا منها وكتب لنا عمر جديد والحين لو ايش يصير ماروح مع احد حتى لو ذاك شسمه ههه يجب اخذ العضه والعيره من القصه عشان تنتبهون "وين ورااهم"ههه أسفه على الاطاله.. يعطيك العافيه مجروح |
رد: ~’, سلسلة القصص ’’ الاعضاء الذهبيهَ .’,~
يعطيك الف عافية على الفكرة الطيبة فعلاً وراقت لي كثيراً
ربي يحفظك من كل شر اليكم قصتي .. بسم الله الرحمن الرحيم اللهم صل على محمد وآل محمد وعجل فرجهم كانت هذي السالفة أيام كنا مبتدئين بقيادة السيارة طبعا كنا نسوق لكن فقط بحدود بلدتنا الطرف مانبعد أبد المهم .. مرة من المرات وكانت في شهر رمضان المبارك عزم فينا واحد من الشباب نروح نتمشى بالسيارة الى النخل وفعلاً رحنا ومستانسين بالطريق وسوالف حتى وصلنا النخل وضلينا مدة بسيطة فجاة عزم سواقنا نروح البر مادري وش اللي خلاه يغير من نخل الى بر شكلة يغير البيئة :p هع المهم ورحنا البر, طبعا كنا سالكين طريق معروف وسهل الرجوع منه ولكن واحد من الشباب قال انا أعرف طريق مختصر للبلد وسواقنا ماصدق خبر ومشى في ذاك الطريق شوي ونشوف مكان اول مرة نشوفه وكله رمل ناعم :confused: ونحوس ونحوس شوي ونغرز بالرمل ونضل في مكانا عالقين :eek: ونحاول نطلع لكن موقادرين لأن مافيه خبرة وكنا صغار على هالوضع والمشكلة رمضان وقرب المغرب ,, ونتوهق وهقه كبيرة ذاك اليوم :( انا اقترحت ان حنا نتصل على أهلنا ونطمنهم لكن كيف ؟؟ قلت انا مالنا الا نمشي الى خط قطر حتى نحصل محطة بانزين ويمكن نلقى بقالة ونتصل منها وفعلاً واصلنا المشي وكانوا الشباب في حالة من الخوف مايعلم فيها الا الله حتى أذكر واحد منا قال ( ليكون نموت بالبر ) ههههههه وانا قعدت اهديه واطمنه ان الوضع راح يكون تمام ان شاءالله وصلنا المحطة وفعلاً اتصلنا على أهلنا وكانوا حدهم خايفي علينا ولا فطروا حتى ذاك اليوم من خوفهم علينا.. وسواقنا شاف رجال بدوي وطلب منه يساعدة في اخراج السيارة من الرمل ولا قصر الرجال وراحوا معاه اثنين منا وارجعوا بالسيارة الحمدلله :) وجاو أخوانا الى موقعنا وطبعا زفونا صح وخناق وحالة وحنا ساكتين مانقدر نقول شي غلطانين :nocoment: ورجعنا البيت والكل منشغل باله والكل يخانق علينا وانتشر الخبر بالطرف بسررررعة شلون مادري :confused: ومرت على خير الحمدلله هذا اليوم ماأنساه طول عمري أبد آسف على الإطالة |
رد: ~’, سلسلة القصص ’’ الاعضاء الذهبيهَ .’,~
فكره حلوه
يعتيك العافيه المجروح لي عوده |
رد: ~’, سلسلة القصص ’’ الاعضاء الذهبيهَ .’,~
رائعة الفكره ومميزه.. أن نقرأ ونتشارك القصص من وقائع الاعضاء.. سوى مفيده أو حزينه أومسليه.. .. مبدع بأفكارك أتمنى لك التوفيق الدائم.. أنين الشوق.. |
رد: ~’, سلسلة القصص ’’ الاعضاء الذهبيهَ .’,~
دائما ما تتحفنا بواضيع رائعه و جميله يؤوووووووووووووووووووو عاد انا عندي قصص كثيرة و مغامرات اسمح لي كل بين فترة وفترة اكتب قصة نبدأ بسمهِ تعالى في احداااااث البقيع كنت موجود في المدينة المنورة انا والأهل بس ابوي مو موجود معنا من صارت الفوضى على طول سحبت اخواني من الحرم النبوي الشريف و رحنا الشقة طبعا الفوضى صار بالعصر ..........المهم ...راح اخوي مجمع طيبة يشترى بعض الحاجات من الحاجات إلي شراهم سكين لزينه ....وهو طالع من سوق طيبة ...شافه شرطي وعلى طول مسكه وقاله ليه شاري السكين و يصارخ عليه ..ويقول من إلي وسوس لك من شيوخكم ..قاله اخوي اي شيوخ الله يهديك انا شاري السكينه لزينه فقط لا غير قاله الشرطي ما تدري ان ممنوع تشتري هالسكاكين ..قاله اخوي المفروض تروحون المحلات إلي تبيع وتمنعونها ....قاله الشرطي و ترادد بعد يالله القسم معاي ...انتو يا الروافض دائما تسوون مشاكل ....المهم ودو اخوي القسم ....اتصل علي واحد من الحملة قال لي وانا في توسعة الحرم شفت اخوك ماسكينه الشرطه وقف قلبي ...قلت له وش مسوي قال ما ادري أنا شفتهم من بعيد ما ادري والله ..قلت له خير انشاء الله مشكور يعطيك العافية وعلى طول رحت القسم كان بعيد شوي من الحرم ...وصلت القسم توني بدخل إلا ذاك العسكري إلي جنب الباب قال لي وين قلت له اخوي عندكم قال من إلي سوو الفوضى قلت له لا ...قال لي اللحين ما تدخل بكره تعال في العزيزية ...يا رجال غير بدل ما يحتاج العزيزية قال لي روووح يا رافضي ....إلا بطلعت الضابط من القسم ...سلمت عليه قلت له اخوي عندكم ما ادري وش مسوي قال لي الضابط هو من إلي سوو فوضى قلت له لا والله واحد شافه ماسكينه واتصل علي ..قال الضابط : وش اسم اخوك قلت له الأسم قال لي هذا عنده سلاح ابيض يعني اكيد يبقى يسوي فوضى ......قلت له شدعوا هذا عمره 15 سنة ما يعرف شيل عصى تقول لي بسوي فوضى تساهل معاي وقال لي كفيل قلت له و انا قالي انت تشتغل قلت له لا ..انا طالب جامعي ..قال لي ما ينفع واتصالات في البلد على اخوي الكبير وروحه وجيه للقسم ...المهم اخوي ما يرفع التليفون و توهقت وما ابقى ابوي يدري لأنه فيه الضغط .. وروحه وجيه للقسم تخيلوا حوالي 120 ريال لتكسي ..المهم ما همتني الفلوس المهم اخوي يطلع قالي الضابط لازم كفيل ...ولا بكره يروح قسم العزيزية وهذا يبعد عن الحرم تقريبا 50 كيلوا متر سدت الدنيا في وجهي ..وقلت لا حول ولا قوة إلا بالله العلي العظيم ...و رحت الشقة شافتني الوالده و قالت لي روح مره شود الله يهديهم ...قلت لها انشاء الله المهم وانا بطريق القسم على الطريق العام ..شفت اخوي ينادي من بعيد مو مصدق قلت يمكن هذا واحد مشتبه فيني قربت ...والله طلع هو طرت من الفرح ... رحت له قلت له شلون طلعوك قال اخوي : اصلا ما عندهم سالفه جاء ضابط ثاني (يمكن الضابط الأول انتهى دوامه وجاء الضابط الثاني ) سئل وش مسوي قال له القصة ..قال الضابط ...ماله داعي تجلس هنا من مجلسك قاله الضابط الي قبلك وقلت له ليه حبسوك قالي القصة انه شراء سكين اسف على الاطاله ولي عودة دمتم بحفظ الباري |
رد: ~’, سلسلة القصص ’’ الاعضاء الذهبيهَ .’,~
في يوم من الايام قررنا مع الاهل نروح البحر فاتفقنا مع النسايب انه نروح واول مره الكل بيروح
حتى الوالد بيروح كان يوم الجمعه فامنا من مشى قبل الصلاه والباقي بعد الصلاه المهم وصلنا وجلسنا فطرنا وخلصنا من الفطور رحنا نسبح الى ان جاء وقت الغداء جاؤ الباقي وجابو الغداء جلسنا نتغداء وبعد ماخلصنا الغداء جلسنا نتقهوا الا اتصلت خالتي على اختي وتقول ان عمي يتصل على ابوي ما يرد ( لانو مافيه ابراج ) خلاص خفنا وش فيهم المهم حاول ابوي الين اتصل على عمي وكلمه وشفنا وجه ابوي تغير قال خلاص قوم نمشي ... ليش ؟؟ قال ابوي يعني جدي تعبان ومشنا عرفنا انو جدي متوفي الله يرحمه بس ما راح انسى ذاك اليوم كيف كنا مستانسين وفجاه ينغلب الحال الى حزن هذه هي قصه من يوم من حياتي ( المجروح 78 ) يسلمووو على الفكره الروعه بترجعنا الى ذكريتنا |
رد: ~’, سلسلة القصص ’’ الاعضاء الذهبيهَ .’,~
قصه تسميتي ( دره الفجر الباسم )
في أيام الدراسه في ثالث ثانوي كانت معاي بنت عمي في الفصل وكنا جالسين نسولف انا دايم احب أرسم بحر قالت ليش ما تحطين عليها لقب يخصك قلت والله ما عرف وش أكتب قالت خلاص انا بكتبه لك وحطت لي اللقب (دره الفجر الباسم ) وبس من ذاك اليوم وانا مش حابه اغيره حاطته في اللبلوتوث والمسن والمنتدى لكم ودددددددي |
رد: ~’, سلسلة القصص ’’ الاعضاء الذهبيهَ .’,~
[quote] يعطيك الف عافية على الفكرة الطيبة فعلاً وراقت لي كثيراً
ربي يحفظك من كل شر [/quote] الله يعافيك .. والله في ذاك اليوم .. كان ظلمة الدنيا عليكم عدل .. اقتباس:
الله يعافيك .. اها ننتظر عودتك .. اقتباس:
يسلموا انين ع المرور .. ننتظر قصتك لنا .. اقتباس:
دائما ايضا انت تكون حاضر .. حياك الله في اي وقت .. اهم شي نكون سلسله رائعه .. اقتباس:
لازم نرجع لذكرياتنا .. الله يرحم جدك .. الله يسلمك .. ننتظر جديد قصصكم .. بالتوفيق .. |
رد: ~’, سلسلة القصص ’’ الاعضاء الذهبيهَ .’,~
اقتباس:
ابشر بالقصص إلي تموتك من الضحك وفي قصص مغامرات الطفوله ...يا ليت ايام الطفوله تعود يوم ....مو الطفوله الشباب يا حظي هع هع تصدق شعاري في الطفوله وسع صدرك واركب سدرك ..وحط همومك وراء ظهرك كأنك مسختها ههههههه .....ناااااااااااشفه |
رد: ~’, سلسلة القصص ’’ الاعضاء الذهبيهَ .’,~
اقتباس:
:) كنا هناك وسمعنا عن هذا الموقف مع بعض الأختلافات في القصة حسب الراوي كل موقف ذكرني بـ مواقف عديدة لكنـ بذكر عن نفس الوقت اللي كانت فيه الفوضى في المدينة أول يوم وصلنا المدينة كنت أنا والوالد وكانت في عائلة من قرايب الوالد معنا ( مو حييل محتكه فيهم المهم بناتهم كانت الزيارة الأولى لهم في المدينة وأمهم من فترة طويلة فما يدلوا طريق الحرم قلت خلاص أنا أعرفه وصلنا الحرم وزرنا وقلنا بنبقى لصلاة المغرب كان عندي كاميرا فممنوع أدخل فـ بقيت في الحرم الخارجي وكانت معي بنتين منهم قالوا بروحوا يتوضوا رحنا وحده من بناتهم نادت لأختها قالت لحظة فجأة أختفوا جلست أدور ... لحد ما رجعت نفس المكان هم كانوا تاركين فيهآ أغراضهم ( حذيانهم الله يكرمكم فخذوهم قلت مو مشكلة ببقى هنا لحد ما يطلعوا لأجل ما نضيع بعض مرت ساعات طويلة وأنا أنتظر كلما أدق على جوال بنتهم مغلق لحد ما تأخر الوقت قلت يمكن أرجعوا السكن خل أمشي وصلت الشقة فـ شافني الوالد سأل وينهم قلت مدري ليه هم ما أرجعوا قال : لا شوي وصادفت أمهم سألتني عنهم قلت لها مدري هم أدخلوا ولا شفتهم بعد كذا ولا يردوا على الجوال وصارت فوضى في السكن ووو وحسيت الكل ينظر إني أنا السبب وأنا مو عارفه شنو أسوي قال الوالد : أصعدي وأنا أروح أشوفهم فجأة أسمع نقاش حاد والكل يتوعد ويهدد :p أدخلوا واللي تبكي واللي تنظر لي بنظرة غضب واللي على طول ما أنتظرت قالت كل منك إنتِ ( تقصدني :cool: إنت السبب ووو جلست أبرئ نفسي لكنـ ماكو مجال .. حاولت أوضح لهم لكنـ بدون فائدة لحد ما تركت الشقة وطلعت ( ;) كان المبنى كامل للحملة اللي كنا فيها وكنت أنا غريبة من بينهم يعني كلهم من منطقة وأنا منطقة آخرى أحترت فين أروح الوالد مع الرجال وما حبيت أخبره فقلت ماكو حل إلا أروح شقة الكوادر شكلهم ناموا والصالة واسعة :p رحت أبكي لحد ما قلت بس ( تعرفوا غربة ووو المهم فجأة أطلعت وحده من الكوادر فجلست أكفكف دموعي ( فشلة قالت شنو فيك قلت لها مافيني شيء ما جأني نوم وطلعت طبعاً هم ما صدقوا لإني قلت لهم عادي أنقل لشقتكم ...؟ قالوا عادي قلت راح أجمع أغراضي ومشت معي وحده من الكوادر وحاولت تعرف السبب وقلت لها قالت خلاص ما عليك منهم لكنـ سبحان الله الله عوضني عنهم بـ اللي في السكن الكل قال أجلسي معنآ وصاروا يمروا وما كأنهم يعرفوني ( اللي تهآوشوا معي هذا الموقف مستحيل أنساه كان اليوم الأول وأول مره أسافر معهم ويحصل كذا وهم صآرت مواقف بسبب هذـآ الموقف بخبركم فيهآ فيمآ بعد إن شاء الله أعتذر على الإطالة |
رد: ~’, سلسلة القصص ’’ الاعضاء الذهبيهَ .’,~
قصه مع جمعت اهلي .. يوم الاربعاء ..
البدايه معي .. دخلت بيت اهلي .. على طول عند الجد والجده اسلم عليهم .. ومن بعدها اشوف عماتي صافين سره جالسين جنب جدي وجدتي .. عاد انا .. من كثرهم قلت بقوه بل .. اشدعوه كذا .. ما لك الا تحب رؤوسهم كلهم .. طبعا في عمتين شباب .. بس يالله حبينا راسهم .. يستاهلون العمات .. طبعا عندي عمه .. ما ارتاح لازم اشوفها واسولف معها .. من حبي لها .. طبعا اجلس مع عماتي .. قشمره ضحك وناسه .. يعني انا وعيال عمي طبعا لازم نفلها مع العمات .. اشوي .. ولا العم العود دخل .. طبعا الغرفه كلهم .. سكووووووت .. ليش .. احين اقول لكم ليش .. لاننا كلنا فزينا علشان نحب راسه .. بس .. طبعا انا من نوع الي يحب يسولف مع عماته .. طبعا سوالفنا كل جديه مع العمه العوده .. يعني نتكلم عن الدين عن المجتمع .. طبعا انا وعيال عمي متوزعون بين عماتي وعمامي .. جمعه حلوه والله .. منها نشوف اهل كلهم .. الان جاء وقت العشاء .. لازم كلنا نروح عند الحوش نستلم الطلبات العشاء نوديها المجلس .. ازعاج وقت العشاء .. تشوف ذاك يقول ياحبيبي قم شل الولدك .. هي انت رح جيب المعالقك .. وين الهريس .......... الخ .. من هالحشي .. خلصنا العشاء .. كلنا قبينا .. رحنا نتابع المباراه .. ما بقى الا عمامي .. طبعا قصباً عليهم يخدمون انفسهم .. هذه جمعت عائلتنا .. كل على هالمنوال .. واتمنى اعجبتكم قصتي مع اهلنا .. بالتوفيق .. |
رد: ~’, سلسلة القصص ’’ الاعضاء الذهبيهَ .’,~
اشكر الجميع على وضع قصص .. لكن اريد دخول ووضع القصه لنا .. نريد انقرأ ..
هل احد بــ يوضع لنا قصص من عنده .. |
رد: ~’, سلسلة القصص ’’ الاعضاء الذهبيهَ .’,~
يوما ً من الأيام في وسط الأسبوع .. بعدما فرغت مما بيدي وقد سمح لي أن أرتحل راجعا ً لبلادي الغالية الحبيبة الطرف ..
وإذ بي أحس بدوار وتعب .. فنويت أن أتأخر لليل ومن ثم أتجه من الدمام للأحساء وقد استاء شعوري لتأخري عن الوصول لأهلي ، إلا أن قلبي متيقن أنه خير لي وفي وقت أذان المغرب .. رن جوالي معلنا ً عن رسالة تقول أنه من المهم تواجدي يوم غد وقد لايقبل عذر التغيب .. عندها حمدت الله لما حصل لي .. :) وقد استفدت .. أن كل مايحصل لي خير وإن ساء ماحصل وهو كذلك للجميع الله يعطيك العافيه أخي غصن الروح كما أنه أفرحني تفاعل بقية الاخوه .. ويستحق هذا التفاعل المتابعه والقراءه والتعليق .. ولكن لي عوده والله ولي التوفيق |
رد: ~’, سلسلة القصص ’’ الاعضاء الذهبيهَ .’,~
بسم الله الرحمن الرحيم ..~
/ طبعاً في البدايه احب اشكر المجروح بحجم الكون واكثر على هذا الطرح الراقي والمذهل حقيقتاً .. دائماً ما تمتعنااا بأروع ما تحمله جعبتك من روائع ..~ / في الحقيقه وكما يبدو لكل معارفي بأني كثيرة المقابل بهم لذا قررت بين الحين والاخر افصح عن مقلب من الكثير من المقالب .. واتمنى ازرع الابتسامه على شفاتكم ..~ / طبعاً المقلب كان في فصل كامل اللي هو فصلي يوم اني في اول ثانوي .. / يوم من الايام كان علينا نشااط اللي هو [ تدبير منزلي - خياطه - فنيه ] والكل متوزع في الغرفه المخصصه .. وانا في قسمي طلبت من اابله اني اروح الفصل اخذ غرض رحت وانا فاتحه شنطتي شفت قلمي الخطاط موجود كان يجي ابليس ويقول سوي مقلب فيهم .. ما حبيت ارده اخذت القلم واكتب على الصبوره [ على جميع طالبات 1/4 التوجه الى الاداره حال حظورهم الفصل ] واكتب تحت الكلام ادارة المدرسه .. ههههههـ .. واروح ركض للبنات واقول لهم وش مكتوب وكل وحده بالموت تهرب من قسمها عشان تلحق على عمرها اذا كانت جايبه مخالفه .. ولحظتها فعلاً اطلعت البلاووووي .. اللي جايبه روج واللي صور واللي علك طبعاً ممنوع وغيره وغيره وكل وحده يبقى تخش اللي عندها في مكان امن المهم صااار فوضه مو طبيعيه وفي وحده من البنات من الملاقيف انزلت الاداره وقالت وش فيكم طالبينا ننزل استغربوا الاداره وش شا الكلام .. قبل لا تصعد الاداريه انا افشيت بالسالفه ههههههـ .. وانا فاطسه ضحك على تعب البنات وحالتهم ورعبهم .. وبعدها اصعدت الاداريه وشافت الكلام وقالت اللي كاتبه الكلام بسرعه تنزل الاداره حالاً وقلبي طربق طربق بس ما عليكم عندي قوة ما يهزها ريح .. ههههههـ .. نزلت وداراً درى وداراً ما درى ورحت وقعدت تهذر على راسي وانا شاقه الابتسااامه .. قالت لي روحي جيبي عباتك والحين راعي الباص يرجعك بيتكم انا ما تحملت كلامها وافقع ضحك عصبت حيل حيل قالت انا احر ما عندي وانتي ابرد ما عندك بس انا اوريك .. جابت دفتر التعهد وكتبتني اني ما اعيد تخويف البنات .. هههههههـ ..~ / وبس وش رايكم ..~ |
رد: ~’, سلسلة القصص ’’ الاعضاء الذهبيهَ .’,~
المجروح 87 .. سبب تلقيب نفسك بالمجروح قصة اعتدنا على سماع أمثالها ، ومثلما يقال .. ( عيال الشر موجودين ) ولكن الغريب في الأمر .. هو تغييرك هذا اللقب ، أتحفنا بقصة هذا التغيير .. :) ، أختي طيف العمر .. فعلا ً كثيرا ً ماتحصل للجميع ، وذلك بادعاء فهم الحياة والإعتمادية على النفس وتقييم الأشخاص ! ولكن الحمد لله انكم بخير نترقب مزيدا ً من قصصك :) ، أخي طرفاوي أصيل .. تعليم القيادة ، يالها من أيام متعة وروعة مواقف حمدا ً لله أنه لم يكن تفكيركم جماعيا ً في الموت وسط البر :) أمتعتنا .. متشوقين للمزيد ، أخي di.maria الحمد لله أنه انتهى الأمر بهكذا وأحداث البقيع لن تنسى على مر العصور والأزمان مترقبين كثير مالديك من قصص كما ذكرت :) ، أختي درة الفجر الباسم الحمد لله على كل حال .. فدوام الحال من المحال المهم أنكم كنتم في حال رائعة وفرحة ، بينما لو كنتم في وضعكم العادي لساء أمركم كثيرا ً وطالما لن تنسي ذلك اليوم أبدا ً .. حبذا لو تقرأي الفاتحه للأموات في كل مرة تذكرينها :) بسم الله الرحمن الرحيم . الحمد لله رب العالمين . الرحمن الرحيم . مالك يوم الدين . إياك نعبد وإياك نستعين . اهدنا الصراط المستقيم . صراط الذين أنعمت عليهم غير المغضوب عليهم ولا الضالين ..) لكل شخص سبب يسبب تغييرا ً او إضافة لحياته .. وروعة لقبك يدل على رقي ذوق من ارشدك له ، كما أنه دالا ً على فكرك ِ المتعلق بالتسمك به نبقى مترقبين .. :) ، أختي أحسائية .. كثيرة تلك المواقف التي نحمد لله على وقوعها رغم سوء الأمور فيها ، فالسوء يجلب لنا الفرح والعواقب الرائعة أحيانا ً وحمدا ً لله أنه نجاكم من سوء ماحصل في تلك الأيام نتطلع المزيد من قصصك ، و إطالتك راعة ;) ، يوم جمعة جامعة رائع .. ومواقف عادة تحصل معنا جميعا ً حين نلتقي أهالينا الله يعطيك العافيه أخي غصن الروح ، أختي ورود .. ! هذا الموقف فقط من مواقفك ومقالبك الكثيرة ! أعتقد أنه ليس بوسعي اللعب مع إدارة مدرسه ! فعلا ً هو مضحك ومخيف في الوقت ذاته نترقب جميع مقالبك لنضحك ونضحك :) أتمنى أن تذكر القصص الحاوية على تجارب مفيدة نعتبر منها ونستفيد ،، فمن تجاربنا نبدع ونرتقي أعتذر أخي غصن الروح .. وكأني صاحب الموضوع حينما علقت على الجميع :) ;) والله ولي التوفيق |
رد: ~’, سلسلة القصص ’’ الاعضاء الذهبيهَ .’,~
اقتباس:
قصة اسمي .. انا طبعا الكل طالب مني ان اغيره لانه يشعرني بــ الحزن .. طبعا انا استجبت لكم .. وانا بــ البحر .. جاءتني فكره .. وعملتها .. هو اني اخذ غصن واضرب بهي البحر .. ولقيته في بالي .. وطبعا اتحفت صديق عمري .. وقلت له هل تعدل لي اسم .. قال فعلا اسمك حلو وهو من اختياره .. قال لي ليه ماتسميه غصن الروح .. وهو قال لي نا راح اغيره الى غصن المحبه .. واتفقنا .. وهذ انا انتظره يرد علينا .. هذا كل شئ .. بــ التوفيق .. واشكرك اخي قاهر المستحيل .. على تعليقك .. اخذ راحتك عادي .. اتمنى انه نال اعجابكم .. ,, ,, دمـــــــ بحفظ ـــــتــــ الرحمن ـــــمــ .. |
رد: ~’, سلسلة القصص ’’ الاعضاء الذهبيهَ .’,~
كويس انهم ثبتوه
لانو يستحق هالشي وانا عندي قصص كثيره بس كلها محرجه احم هع يعتيكم العافيه لاتخلونا ننتظر كثير فرجونا قصصكم |
رد: ~’, سلسلة القصص ’’ الاعضاء الذهبيهَ .’,~
" موضوع روعه الله يعطيك العافيه اخي غصن الروح لي عوده " |
رد: ~’, سلسلة القصص ’’ الاعضاء الذهبيهَ .’,~
اياااااااااااااااااااااااااام متوسطة
في يوم من الأيام ...تجمعنا كالعاده وباقي كم واحد من الشباب ما جاء قال لنا واحد من الشباب شرايكم نسوي لهم مقلب ....قلت له انا وشلون قال سهله نروح مطعم الساااااااامره و اقول انا عازمهم وانتو ردوني يعني قولوا مثلا شبعانين واسحب عليهم ولا ادفع عنهم ......قلنا اوكي .......... جاء باقي الشباب ورحنا المطعم قال خوينا بالله انا عازمكم ....احنى مثل ما اتفقنا قلنا ما نبقى عاد ما صدقوا على الله ....تعرفون اول الفلوس مو كثيره عندنا طلبوا و اكلوا ....المشكلة مو كذا ...المشكلة ان واحد من إلي كان معنا استوعب خطتنا هع هع هع وطلب معهم ....انزين جاء وقت الحساب ...جاء المصري وقال وين الحساب ........قالوا هذا الرجال بيعطيك قال لهم انا مالي شغل انا ما طلب شي .....شلون يا فلان انت إلي قلت لنا اليوم عازمكم ....المهم احنى طلعنا وهم جالسين في المطعم .........شوي جاوا لنا في الجلسة ..سئلناهم كيف دفعتوا قالوا جاء واحد ودفع عنا هههههههههه عاد هم في عيونهم شر وقالوا بنرده لك المقلب لا تخاف .......................................عاد تتوقعون كم الحساب 20 ريال هع هع هع وبث ولي باااااااااااااااااااك |
رد: ~’, سلسلة القصص ’’ الاعضاء الذهبيهَ .’,~
اقتباس:
أنه كل مشرف متواجد من أجل خدمة المنتدى والأعضاء واستحقاقه منذ وقت طرحه ،، ،، أضحكتني أخي di.maria ،، بالفعل تلك الأيام كانت تحوي كثير مثل هذه المقالب ، وكثيرا ً ماتحصل مواقف كثيرة ياليت أيام متوسط تعود يوما ً :):) نترقب مقالب أكثر وأكثر .. في الواقع قد أخذ حماسي هذا الموضوع ، وأعود لأكرر أسفي لأخي غصن الروح وكما أكرر تمنياتي بأن توضع القصص المفيدة ذات فائدة تفيد الجميع والله ولي التوفيق |
رد: ~’, سلسلة القصص ’’ الاعضاء الذهبيهَ .’,~
انا صارت لي قصه مع اعز صديقة لي
m صديقتي الروح بالروح عمري كله ماكان عندي صديقة افضفض لها مافي قلبي كان عندي بالغرم ان عندي شعبيه كبيرة بالمدرسة والجامعه تعرفت عليها بالجامعه سنه بعد سنه تقوى علاقتنا ببعض اكثر جاء وقت التخرج والصياح على اصوله كيف بنعيش واحنا بعاد عن بعض لان صديقتي مو من الطرف ماكانها بعييييييييد المهم بعد التخرج مرت ايام وشهور وسافرنا ورجعنا وكل وحده منا حارقها الشوق بقوة في يوم دقت علي صديقتي m تعزمني على حفلة تخرجها في المنتجع الفلاني انا طرت من الفرح اخيرا بشوفها عاد انا على طول شريت الهدية كان حرف m ذهب وشريت باقه ورد جاء وقت الروح حدي متحمسه تعدلت وتكشخت احلا شياكه عشان بوقف جنب صديقتي وقت الحفلة المهم ركبت السيارة كان معاي امي وخواتي الصغار وكل وده بيدها ورده انا شرتها عشان يقدمونها لصديقتي وقدام ابوي واخوي كانوا معزمين على عرس المهم مشينا بعد ماوصفت لي صديقتي المكان لما وصلنا ضيعنا دقيت عليها ماترد اخوي عصب وقام يصارخ انا بديت اتوتر دقيت مرة ثانيه ماترد انا بديت احاتيها اشفيها ماترد كسرت الجوال وردت ياربي اشفيها واخوي ماوقف صراخ علي انتي وانتي ... الخ قال خلاص مافي روحه رجعنا انا لاشعوريا رديت بقوة والله مو كيفك بعدها سكت وانا حالتي حاله (توتر- قلق -شوق -عصبية - محاتاه -صياح) كلها اجتمعت فيني المهم وحنا ندور شفنا لوحه مكوب عليها منتجع فلان الحمدلله وصلنا ودخلنا انا دخلت قبل امي وخواتي يووووو انا انصدمت وقفت مثل الصنم تدرون ليش خخ لاني دخلت وفي وجه الحضور والكل يطالعني انا ماحب هالمواقف لانها تربكني عاد امي اسبقتني وقالت تعالي نجلس هناك جنب الشلال رحنا وجلسنا طبعا انا ماوقفت دق على صديقتي لان بالي مشغووووووووول حده ولاترد بعدين تذكرت ان عندي رقم جوال مرت اخوها ياربي شو هالنسيان دقيت على مرت اخوها ردت صديقتي قلت لها انتي وينش قالت انا في الصاله الداخليه تعالي انا سكرت بوجهها وعلى طول رحت لها هي فتحت الباب بسرعه وقفنا نطالع بعض شوي بعدين تتوقعون شنو صار؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ اخليها بالبارت الجاي خلاص امزح لاطقوني المهم المتوقع اني اخذها بالاحضان بس الي صار شي مومتوقع ابدا انا اول ماشفتها رفعت ايدي وعطيتها ذاك الكففففففففففف القوي الي فر وجها فر حتى كل الي بالصاله الداخليه وقفوا مذهولين يطالعون شسالفه هي صرخت تقول ليش تطقيني كان الكف حااااااار انا لما شفت نظرات اهلها ماعرفت شنو اسوي قلت اقولها انتي ماتردي وليش ماتردي المفروض تتوقعين اني بدق ...الخ قالت لي الجوال عند خواتها الي برااا يقرون منه حديث الكساء المهم انا حسيت اني مو قادرة اوقف على رجولي جلست على كنبه قريبه صديقتي نفس الشي مو عارفه شنو تسوي طلعت عشان تخفف حدة الموقف لو بقت اكثر كان انفجرت صياح كل اي في الصاله طلع انا ظليت مع نفسي احاول استوعب الي صار انا شنو سويت وليش سويت كذا ليت الارض انشقت وابلعتني ليت ايدي انكسرت ليتني ماجيت حسيت بنااااار بقلبي المهم حاولت انسى السالفه مؤقتا على الاقل عشان صديقتي مابغي اخرب حفلتها لان ماينفع الندم صار الي صار قمت وتعدلت وطلعت بكشختي واحلى ابتسامه مرسومه على وجهي لان صديقتي تحب ابتسامتي كثيييير بالرغم ان قلبي ينزف من الداخل هي لما شافتني ابتسمت حسيت من ابتسامتها انها نست كل شي وتبغيني انا بعد انسى رحت جنبها ومسكنا يد بعض وكانوا حاطينا قصيدة باسم ماذكرها بس انا احبها والمهم استنانسنا وفرحنا طول وقت الحفله المهم تأخر الوقت دق ابوي وطلعنا بس قبل نطلع قدمت حق صديقتي الهدية وباقه الورد وحضنتها بقوووة وهمست لها سامحيني يالغلا والله مو قصدي مادري شنو صار فيني قالت ادري وانسي السالفه انا مهما كان مازعل من قلبي انا ارتحت بس مازال قلبي يشتعل نااااااااااااااااااااااااااااااااااااااااااااااااا اااار لليوم وموقادرة انسى السالفه انا عمري ماعطيت احد كف كيف اعطي شخص حبيته وتعلمت من هالقصة اني املك نفسي عند الغضب واتعوذ من ابليس كل ماعصبت واكرر ياكاظم الغيض واصلي على محمد وآل محمد وللللللللل حشى مو قصه روايه صج هذرةخخخخخخخخ عذروني طولتها يسلمووووووووو غصن الروح على الطرح المميز والف الف الف مبرووووووك على النك الجديد عجبني حييييييييييييييييل لاتغيره |
رد: ~’, سلسلة القصص ’’ الاعضاء الذهبيهَ .’,~
الشكر كل الشكر على الدعوه ياغصن الروح
سوف اتكلم عن موقف صار معي بختصر الكلام السالفه وما فيهاا انو زوجي عنده ضعف نظر وكل مره في الطريق اذا كان نهاار والشمس قويه اقوله يل أمش يلا لف ومن هالكلام .. وهو حيل يعصب علي ويقول قومي مكاني احسن بعد ا ويتذمر من كلامي له .. وقلت في خاطري ارويك .. هذا جزاتي .. ويوم من الايام وحنا راجعين من الهفوف وقفنا عنده اشارة الطرف وهي حمرا والشمس صايره قويه وبعدين شتغلت خضرا وظليت ساكته وحنا مازلناواقفين في السياره ورجعت الثانيه وشغلت حمراوقول في نفسي ا لحمد للة ماحد موجود وهم ما تكلمت قال هووش سالفة الاشاره خربانه قلت يا حظي الاشاره شغاله عصب ع وليه ماتكلمين الجو حار مستانسه ردي ت عليه بكل بورد اعصاب بس علشااان تتأدب ما تتذمر من كلامي هههههههههه وبس |
رد: ~’, سلسلة القصص ’’ الاعضاء الذهبيهَ .’,~
مساااءكم ورد وفل وياسمين ..~
/ مبارك عليكم المولد .. / رجعت لكم بمقلب جديد ..~ / يوم من ايام المدرسه يوم اني في ثالث ثانوي .. شريت علبتين ماااي وصبيت منهم اشوي وحطيت في الماااي حمض الجوهر [ اللي يحطونه في ورق العنب ] المهم وحطيت فيهم وخضيتهم بالقوووووه لين ذاب كله .. وجيت وعطيت بنت اختي اول وحده وستجنت من قو الطعم ههههههههههـ .. جداً حامض ومالح في نفس الوقت .. وبعدها سكتها انها ما تقول لاحد وامشي واعطي البنات بحجة انو ماي مقري فيه هههههـ .. ومساكين البنات مغفلات هع يعني وش ذا الثقه تاخذون تدرون وش مقري فيه الحمدلله والشكر .. والمهم كل وحده يا الله شنو شكل وجهه وملامحهاا يا رباااااااااه موووت يضحكووون .. انزين وبعدها ارسلت لصديقتي وحده ولكن بجد تندمت .. ومن سوء الحظ كانت عطشااانه وبس وصلتها علبة الماااي قالت يا عمري على صديقتي حاسه فيني هههههـ .. وبس اشربت كاتها صدمه قويه من قووووووووو الطعم .. ههههههـ .. والمشكله العظمى انها تأثر كثير وتعبت من معدتهااا وتغير صوتهااا كثير .. ظلت تقريبا اسبوووع مريضه ..~ / وبس .. انتظروني بالمقلب الجاااي ..~ |
رد: ~’, سلسلة القصص ’’ الاعضاء الذهبيهَ .’,~
خادمه زينبيه / الله يديم المحبه بينكم بس بصراحه مو قصه روايه طولتيها :p >> امزح |
رد: ~’, سلسلة القصص ’’ الاعضاء الذهبيهَ .’,~
انا اكثر قصصي كلها ذو مشاكل عويصه :) بس بذكر لكم قصه قبل سنين واحنا صغار المهم اول انا واخوي الاصغر وولد عمي وولد عمتي كنا سهرانين في بيتنا لا الصباح عاد انا طالع فيها شرايكم نروح نشتري خبز تميز وفول وعدس ;) المهم قالو موافقين ومن بعد صلاه الفجر رحنا مشي وكنا فرحانين وصلنا عند محل التميز وطلبنا وكان الدفع نظام امريكي :cool: انا دفعت الافلوس ولا بمرت عمي بالسياره وهو رايح العمل ويشوفنا عاد الحين قلوبنا طربق طربق وحنا صغار تعرفون يخافون علينا المهم جانا عمي وقالو ركبو السياره تتوقعون اشقلت له والطلب ماخلص:p قهر مجمعين الافلوس رحنا البيت ولد عمي وولد عمتي راحو عاد رحنا البيت وابوي في وجهنا اخذ من الصراخ والتخويف >> التخويف معناتها مافي سفره في العطله ;) بس امي الواسطه بس في ما بعد نسرد لكم القصص المضحكه .. دمتم بووود . |
رد: ~’, سلسلة القصص ’’ الاعضاء الذهبيهَ .’,~
طيف الجنه خخخخ ضحكتيني والله
عدل شغلك هع |
رد: ~’, سلسلة القصص ’’ الاعضاء الذهبيهَ .’,~
قصة صغيره بس تضحكون منها
من مقالبنا واحنى صغار نسوي روحنا نتضارب و إذا جاء واحد يفاككنا نقوله معاك الكاميرا الخفيفه ههههههههههه عاد انت وحظك إذا طلع واحد طيب يضحك معنا اما إذا طلع واحد عصبي ...خذ ذاك السب واللعن والشتم هههههههههههههههههههه دمتم بحفظ الباري ولي باااااااااااك |
رد: ~’, سلسلة القصص ’’ الاعضاء الذهبيهَ .’,~
خخخخخخخ
عليك حركات مدري من وين تجيبها هع |
رد: ~’, سلسلة القصص ’’ الاعضاء الذهبيهَ .’,~
هذا الله يسلمكم ايام ما كنت في ابتدائي
طلعت مع واحد من الشباب نتمشى ولا احد معنا بس اثنينا المهم قالي شرايك نسوي مقلب قلت له انت مجنون من معانا علشان نسوي مغلب له قال لي ادري يعني انا غبي ......راح نسوي مقالب مع إلي يسقون سيارات قلت له شلون قال بسيطه ....إذا جات سيارة انقز فوق كبوت السيارة طبعا احنى مو في شارع عام في الديرة جنب بيت صالح الناصر بو الحر الله يرحمه قلت له انت مجنون ....قال الحياة من دون مغامرات ما تسوى <<<شوي شوي يا طرزان والله المجنون سواها ...قربت سيارة ..وشوي يطلع من الزاوية و كانه يركض و ينقز فوق السيارة و يطب في الأرض ويعنه متعور ....المقلب مو هنا المقلب إن الرجال نزل من السيارة قال له اوديك المستشفى قال صديقي لا عطني 100 ريال وانا بروح الجمعية هههههههههههههههههه والرجال صدق مسكين على نياته و عطاه الفلوس ههههههههههههههههههه عاد ذاك اليوم ما انساه رحنا الحديقة و رحنى مطعم الشرقيات هههههههههههههههههههههههههههههههههههههههههههههههههه هه لي بااااااااااااااااااااااااك |
رد: ~’, سلسلة القصص ’’ الاعضاء الذهبيهَ .’,~
يابو مغامرات di.mariaهههههههههههههههههههههه ماشاء اللة عليك كل حياتك مغامرات والمصيبه ان الصدقائك مثلك
|
رد: ~’, سلسلة القصص ’’ الاعضاء الذهبيهَ .’,~
قصه من جدتي ..
تقول جدتي .. كان عندهم بقره عوده .. كانوا يحلبونها .. هذا الحليب طبعا فيه فوائد كثيره .. ايام قبل مايدرووون عن الفوائد .. هذا الحليب طبعا جاءت حاله ولاده صعبه على الدايه .. قالت الدايه جبوا لها حليب .. جاءت الصدف وان يكون هذا الحليب هو الشافي من بعد الله .. شربت الحرمه هذا الحليب .. فعلا تيسر امرها .. ولدت الولد .. هذا الولد طبعا في طريقه الى دكتوراه .. عاد من حريم القبل السالفه ماتنخش .. عاد تقول جدتي .. من كثر الحريم الجاو لها ماحد تيسر امره .. لانهم كان بــ اعتقادهم هو الي بــ يشفيهم .. حتى بــ فلوس يبون من الحليبها قصب .. شاءت الاقدار وتوفت البقره .. البيت تقول فاضي من بعد ما كان ممتلئ من الناس .. فائده القصه .. انك لاتمشي ورى كلام الناس .. امشي على ما تجود به نفسك .. لانه اعتقادهم بــ كون خاطئ .. الشفاء بــ يد الله سبحانه .. بــ التوفيق .. |
رد: ~’, سلسلة القصص ’’ الاعضاء الذهبيهَ .’,~
دي ماريا
خخخخخخخخخخ حرام عليكم والله و100 في ذمتكم هع ماتخلص مقالبك يا بو المقالب غصن الروح هع ضحكتني قصة البقره هع والله الناس عليهم اشياء مدري كيف يعتيك العافيه |
رد: ~’, سلسلة القصص ’’ الاعضاء الذهبيهَ .’,~
اقتباس:
|
رد: ~’, سلسلة القصص ’’ الاعضاء الذهبيهَ .’,~
جيت مره ثانيه ..
/ يوم من الايام سويت مقلب حق ابووووي يا عمري يا يبه .. المهم كان عن اخوي الصغير [ بريعصي ] مكرمين السامعين .. واخذته ولصقته في جدار الصاله .. قبل موعد جيت ابوي من العمل .. وبس سمعنااا صوت سيارته ونقوم بالتمثيليه انا واختي واخواني الانثين ( بلوط وعلقم ) هههههـ انا اسميهم هيك هع .. وونبتدي نصرخ وبدخلت ابوي وينفعل حيييل وش فيكم وش صاااير واحنا نأشر ومنطمين يا بو زعم خايفين .. وشافه وعلى طول قال جيبووو [ العسو ] هههههـ وجبناااه وحيل يضرب في عمر هالبريعصي قطيعه تقطعه وحيل وحيل والبريعصي مو متحرك ولا شيء وحنا من ورا ابووووي ميتين ضحك هههههـ التفت علينا شافنا نضحك رمى العسو .. وصعد فوق .. / وبس حيل كسر خاطري .. |
رد: ~’, سلسلة القصص ’’ الاعضاء الذهبيهَ .’,~
اقتباس:
حرام عليكم .. خوفتوه وهو جاي تعبان .. الله يذكرك بــ شهاده .. طبعا عندنا عمات تخاف من الصراصير والبريعسي .. انا وعيال العمي الحلوين .. كنا متجمعين في الصرف كان يوم الخميس .. ننتظر تجي لــ حماره علشان نلاحقها .. عاد خلصنا من ملاحقتها .. بعد ما يننا الهندي مسكين .. نثرنا الحشيش عليه مسكين .. ذاك اليوم .. نزلنا الحشيش ... واذا بــ صرصور موجود وعلق في بدلت ولد عمي .. ونروح الداخل النخل .. وخلينا ابزران يصوحووووون .. كذا اخترعوا عماتي .. على طول بره الشارع .. حرام خليناهم بــ دون عبايات .. ههههههههه .. سامحونا عاد يا عماتي .. واذا نضحك ونقول لهم ترى هذا صرصور مو بريعسي يعنه عدلناه .. قربنا الولد العم لهم .. علشان يوخرونه طلعوا الحريم هم خوافييين .. كذا حنا طقينا صدرنا .. ورحنا نوخره من بدله .. واذا اهي تجيك في اذن ولد عمتي وتقرضه له .. كذا صارت السالفه صج .. وخذ عاد ذاك السب والطق من مرت عمي .. اتوقع العسو مابرح في النخل .. الي طقتنا فيه .. |
رد: ~’, سلسلة القصص ’’ الاعضاء الذهبيهَ .’,~
غصن الروح
ههههههههههههههههه حلوة ذكرتني الايام العسو بس الحمد للة ماعمري ما أنطقيت ياغصن الروح اللة يخليلك عماتك |
رد: ~’, سلسلة القصص ’’ الاعضاء الذهبيهَ .’,~
وين الجماعهـ قفلوا ما عندهم قصص ..
اشدعوهــ من يشرفنا .. ويلقي علينا قصصهــ ... (قاعد في سوق الطرارهــ ههههه ) .. |
| الساعة الآن 07:05 AM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir
ما ينشر في منتديات الطرف لا يمثل الرأي الرسمي للمنتدى ومالكها المادي
بل هي آراء للأعضاء ويتحملون آرائهم وتقع عليهم وحدهم مسؤولية الدفاع عن أفكارهم وكلماتهم
رحم الله من قرأ الفاتحة إلى روح أبي جواد